Muergos invasores na costa asturiana

Navayes invasores. LNE

Navayes invasores. LNE

Los muergos o navayes invasores de la costa asturiana foron descrites por Conrad en 1843 pa les costes americanes, concretamente na estaya que va del Llabrador a Carolina del Sur. Llegaren a Europa en xunu de 1978, al estuariu del Elba, mediante agües de llastre. D’ehí fue estendiendose, a partir de 1982, mui rápidamente a otros países, como Dinamarca, Holanda, Noruega, Bélxica, Francia y el sureste d’Inglaterra, siendo encontráu inclusu nel Mar Bálticu en 2005.

Según un estudiu de Nuria Anadón Álvarez, catedrática de Zooloxía de la Universidá d’Uviéu, y Andrés Arias Rodríguez, becariu del FICYT, publicáu na revista maliayesa “Cubera”, estos exemplares invasores recoyéronse per primera vez na ría de Villaviciosa. Posteriormente foron recoyíos n’agües non mui fondes d’otres llocaliaes de la costa asturiana, como’l puertu d’El Musel (Xixón), Lluanco, San Xuan de Nieva (Avilés) y Otur (Valdés).

Lluis Portal / La Nueva España

Según los investigadores, ye probable qu’esti muergu “Ensis directus” llegó a la costa a treviés de buques fletaos dende puertos europeos con presencia d’esta especie. La entrada más afayaíza n’Asturies ye’l principal puertu asturianu d’El Musel, pues a partir de los años 90 mantién rutes regulares con varios puertos europeos como Rotterdam, n’Holanda, y puertos alemanes como Hamburgu, Luebeck y Bremen.

Sólo nel añu 2000 arribaron a Xixón un total de 24 buques mercantes procedentes de Rotterdam, y 10 dende Alemania -principalmente dende Hamburgu-. Una vez na costa d’Asturies les sos vives planctóniques pudieren dispersase por mediu de corrientes marines dende Xixón hasta les llocalidaes en qu’anguañu s’afayen.

Na ría maliayesa atópase nos sectores esternu y mediu del estuariu. Na parte esterna ye prácticamente l’unicu muergu que s’atopa, anque nel pasáu foron les especies llariegues “Ensis arcuatus” y “Ensis siliquia” les comunes. Así, según los citaos investigadores, nel Departamentu de Bioloxía d’Organismos y Sistemes (Zooloxía), hai exemplares conservaos dende finales de los años setenta hasta finales de los noventa, procedentes del estuariu esternu, que lo determinen. A principios de 2000 ya s’alcontraren los primeros exemplares del muergu o navaya americana.

La presencia de la especie foriata fue causando un paulatín desplazamientu de les especies autóctones, fundamentalmente del “Ensis arcuatus”. Esti comportamientu ye conocíu como “especie exótica invasora”. Nel sector mediu de la ría convive esta especie con otra denominada “Solen marginatus”, conocida como “muergu rugosu” o “mangu de cuchiellu”.

El “Solen marginatus” ye ampliamente recoyíu pelos mariscadores maliayos, son diferentes a los verdaderos muergos (xéneru Ensis), diferenciense por un suquín bien aparente nel estremu esternu de la concha -que nun esiste nel muergu- y pel so collor mariellu unifome, frecuentemente escurecíu a consecuencia de la basa na qu’habita.

L’ésitu del muergu “Ensis directus” al colonizar varies zones costeres asturianes -la única parte de les costes españoles en ser colonizada- débese a delles ventaxes que tien la nueva especie: una gran resistencia fuera del agua, pudiendo permanecer un tiempu llargu n’emersión. En segundu llugar pola so movilidá, lo cual permite cambiar la zona d’esplotación en favor de les condiciones más favorables.

Ye’l muergu más vendíes en mercaos y grandes superficies, y véndense vives dende Irlanda y Holanda. Otra de les razones del so ésitu ye la gran resistencia a la depuración industrial que permite conservase vives durante varios díes.

En definitiva, pa Nuria Anadón y Andrés Arias, les poblaciones de muergu americanu tienen una capacidá d’adaptación que permite meyorar un recursu autóctonu como oxetu de cultivu y marisquéu.

Esta entrada fue publicada en Cultura, Naturaleza y etiquetada , , , . Guarda el enlace permanente.

Los comentarios están cerrados.